हाउसफुल 5 चे दोन क्लायमॅक्स थिएटर मालकांसाठी ठरले डोकेदुखी, हटवले जात आहेत शोज, ही आहे खरी कारणं

अक्षय कुमार आणि रितेश देशमुख यांच्या प्रमुख भूमिका असलेली मल्टीस्टारर कॉमेडी फिल्म हाउसफुल 5 सध्या सिनेमागृहांमध्ये प्रेक्षकांचं भरपूर मनोरंजन करत आहे.

साजिद नाडियाडवाला यांची निर्मिती असलेली ही चित्रपट मालिका यावेळी एका नव्या प्रयोगासह आली - दोन वेगवेगळ्या क्लायमॅक्ससह. हाउसफुल 5 दोन वर्जनमध्ये प्रदर्शित झाली आहे - हाउसफुल 5A आणि हाउसफुल 5B. मात्र, हा प्रयोग सध्या निर्मात्यांच्या अंगलट आल्याचं दिसत आहे.

हाउसफुल 5 6 जून रोजी थिएटरमध्ये प्रदर्शित झाली. अजून आठवडाही पूर्ण झाला नाही, आणि या चित्रपटाचे काही शो थिएटरमधून हटवले जाऊ लागले आहेत. बॉलिवूड हंगामाच्या वृत्तानुसार, डिस्ट्रीब्युटर्स आणि निर्मात्यांनी दोन्ही वर्जनच्या शोना समान स्क्रीन स्पेस देण्याचा निर्णय घेतला होता.

पण रिलीजनंतर प्रेक्षकांनी केवळ हाउसफुल 5A या वर्जनलाच जास्त पसंती दिली. त्यामुळे हाउसफुल 5B चे शोज कमी केले गेले असून, काही थिएटरमध्ये तर ते पूर्णपणे हटवले गेले आहेत.

कोणत्या वर्जनची तिकिटं जास्त विकली जात आहेत?

उत्तर भारतातील एका एग्झिबिटरने हाउसफुल 5B चे शोज कमी करण्यामागचं कारण स्पष्ट केलं. त्यांनी सांगितलं - "5B चे शोज कमी करण्यात आले आहेत कारण बुकिंग वेबसाइट्स उघडल्या की 5A हे वर्जन सर्वात आधी दिसतं. त्यामुळे प्रेक्षक लगेच तेच सिलेक्ट करतात आणि तिकिटं बुक करतात.

5B चा पर्याय बघायलाही कुणी जात नाहीये. त्यामुळे थिएटरमधील शोज 50-50 किंवा 60-40 च्या प्रमाणात होते. पण जेव्हा थिएटर मालकांना लक्षात आलं की काय होतंय, तेव्हा लगेच ते बदल करण्यात आले. सध्या हे प्रमाण 70-30 किंवा 80-20 झालं आहे."

5B चे शोज का हटवले जात आहेत?

फ्रायडे सिनेमाने देखील यावर भाष्य केलं - "काही लोकांनी समजून टाकलं की हाउसफुल 5B हे हाउसफुल 5A चं सिक्वेल आहे. त्यामुळे त्यांनी आधी 5A पाहायचं ठरवलं आणि विचार केला की पुढच्या आठवड्यात किंवा वीकेंडला 5B बघू.

याशिवाय, BookMyShow सारख्या प्लॅटफॉर्मवर ग्राहक जेव्हा बुकिंग करतात तेव्हा सर्वात आधी 5A हे वर्जन दिसतं. त्यामुळे त्याचाच शो प्रेक्षक निवडतात आणि तिकिटं बुक करतात. याचा थेट परिणाम 5B च्या प्रेक्षकसंख्येवर झाला. त्यामुळे 5A ला खूप चांगला प्रतिसाद मिळाला, पण 5B ला खूपच कमी लोकांनी पसंती दिली."

सध्या तरी या अभिनव मार्केटिंग स्ट्रॅटेजीचा परिणाम मिश्र स्वरूपाचा दिसत आहे. निर्मात्यांचा हेतू दोन्ही वर्जनमधून प्रेक्षकांना दोन वेगवेगळ्या शेवटांचं अनुभव देण्याचा होता, पण प्रेक्षकांची सवय आणि ऑनलाईन बुकिंग सिस्टिममधील प्राथमिकता या दोन्ही बाबींमुळे एक वर्जन दुसऱ्याच्या तुलनेत खूपच जास्त चाललं आहे. त्यामुळे चित्रपटगृहांमध्ये आता हाउसफुल 5A वरच अधिक भर दिला जात आहे.