Baaghi-4 BO Collection : 'बागी 4' चा बॉक्स ऑफिसवर धुमाकूळ, 40 चित्रपटांचे रेकॉर्ड मोडले, कमाई किती?

Baaghi 4 Box Office Collection Day 2 : अॅक्शन हिरो टायगर श्रॉफ आणि प्रसिद्ध निर्माता साजिद नाडियाडवाला यांच्या यशस्वी जोडीचा 'बागी' चित्रपट मालिका प्रेक्षकांच्या पसंतीस उतरली आहे. या मालिकेतील चौथा भाग 'बागी-4' हा 5 सप्टेंबर 2025 रोजी मोठ्या पडद्यावर प्रदर्शित झाला आणि पहिल्या दोन दिवसांतच चित्रपटाने बॉक्स ऑफिसवर जबरदस्त कमाई करत अनेक विक्रम मोडले आहेत.

'बागी 4' चा बॉक्स ऑफिसवर धुमाकूळ

• या चित्रपटाने पहिल्याच दिवशी 12 कोटी रुपयांचे कलेक्शन केले, जे अंदाजित ओपनिंगपेक्षा जास्त आहे. या कमाईने पहिल्या दिवशीच दोन डझनांहून अधिक चित्रपटांना मागे टाकले.
• दुसऱ्या दिवशी सायंकाळपर्यंत चित्रपटाने 3.64 कोटी रुपयांची कमाई केली, ज्यामुळे एकूण कलेक्शन 15.64 कोटी रुपयांवर पोहोचले आहे.
• या यशामुळे, 'बागी 4' 2025मधील आतापर्यंतच सर्वात मोठ्या ओपनिंग कलेक्शन असलेल्या चित्रपटांच्या यादीत 8 व्या क्रमांकावर आला आहे.
• त्याने 'जाट' (9.5 कोटी) आणि 'सितारे जमीन पर' (10.6 कोटी) सारख्या चित्रपटांनाही मागे टाकले आहे. आता सर्वांचे लक्ष चित्रपटाच्या पहिल्या वीकेंडच्या कलेक्शनवर आहे, कारण तो वीकेंड कलेक्शनच्या यादीतही स्थान मिळवण्याची शक्यता आहे.

40 हून अधिक चित्रपटांचे मोडले रेकॉर्ड

'बागी 4' ने केवळ दोन दिवसांत अनेक मोठे रेकॉर्ड मोडले आहेत. या चित्रपटाने 2025 मध्ये प्रदर्शित झालेल्या 13 चित्रपटांचे एकूण कलेक्शन पार केले आहे.

यात 'लवयापा' (6.85 कोटी), 'क्रेझी' (12.72 कोटी), 'फतेह' (13.35 कोटी), 'इमर्जन्सी' (18.4 कोटी) यांसारख्या चित्रपटांचा समावेश आहे. याशिवाय, चित्रपटाने पहिल्या दिवशीच 2025 मधील 27 चित्रपटांच्या पहिल्या दिवसाच्या कमाईला मागे टाकले आहे.

यामध्ये 'मेट्रो इन दिनोन', 'मलिक', 'माँ', 'कंपी' सारख्या चित्रपटांचा समावेश आहे. म्हणजेच, 'बागी 4' ने अवघ्या दोन दिवसांतच 40 हून अधिक मोठे रेकॉर्ड मोडले आहेत.

चित्रपटाचे बजेट आणि जागतिक कमाई

इंडियन एक्सप्रेसच्या रिपोर्टनुसार, 'बागी 4' हा चित्रपट सुमारे 200 कोटी रुपयांच्या बजेटमध्ये बनवला गेला आहे. ए. हर्षा दिग्दर्शित या चित्रपटात संजय दत्त, टायगर श्रॉफ, हरनाज संधू आणि सोनम बाजवा यांसारख्या कलाकारांनी अभिनय केला आहे. सकनील्कच्या माहितीनुसार, चित्रपटाने पहिल्या दिवशी जगभरात 17.15 कोटी रुपयांची कमाई केली आहे.