स्पर्धा परीक्षांची तयारी करणाऱ्या युवकांसाठी मोठी संधी: आता मोफत कोचिंग, कुठे अन् कसा करायचा अर्ज!

Updated: Thursday, August 14, 2025, 16:22 [IST]

MPSC-UPSC free coaching exams 2025 : महाराष्ट्रातील स्पर्धा परीक्षांची तयारी करणाऱ्या विद्यार्थ्यांसाठी एक आनंदाची बातमी आहे. राज्य सरकारच्या विविध संस्थांमार्फत आता विद्यार्थ्यांना मोफत स्पर्धा परीक्षा प्रशिक्षण दिले जाणार आहे. बार्टी, टीआरटीआय, सार्थी, महाज्योती आणि आर्टी या पाच संस्थांमार्फत हे प्रशिक्षण आयोजित केले आहे.

कोणत्या परीक्षांसाठी मोफत कोचिंग?

या योजनांमधून विद्यार्थ्यांसाठी खालील स्पर्धा परीक्षांची तयारी करून घेतली जाईल:

यूपीएससी नागरी सेवा परीक्षा (दिल्ली येथे)
यूपीएससी नागरी सेवा परीक्षा (महाराष्ट्रामध्ये)
राज्यसेवा परीक्षा (MPSC)
अभियांत्रिकी सेवा परीक्षा
न्यायिक सेवा परीक्षा

हे प्रशिक्षण नामांकित खासगी संस्थांमार्फत दिले जाणार आहे, ज्यामुळे विद्यार्थ्यांना उत्तम दर्जाचे मार्गदर्शन मिळेल.

कोण करू शकतो अर्ज?

हे प्रशिक्षण विविध समाज घटकांसाठी उपलब्ध आहे आणि प्रत्येक संस्थेची उद्दिष्टे त्यांच्या लाभार्थी गटावर आधारित आहेत:

BARTI (बार्टी): अनुसूचित जाती (SC)
TRTI (टीआरटीआय): अनुसूचित जमाती (ST)
SARTHI (सार्थी): मराठा आणि मराठा-अनारक्षित प्रवर्ग
MahaJyoti (महाज्योती): इतर मागासवर्गीय (OBC)
ARTI (आर्टी): आर्थिकदृष्ट्या दुर्बल घटक (EWS)

अर्ज कसा करावा?

या प्रशिक्षणासाठी अर्ज करण्याची प्रक्रिया ऑनलाइन आहे. अर्ज करण्यासाठी, तुम्हाला बार्टीच्या अधिकृत वेबसाइटवर (http://barti.maharashtra.gov.in) जाऊन अर्ज करावा लागेल. याच वेबसाइटवर या योजनेबद्दल सविस्तर माहिती, शासन निर्णय आणि आवश्यक कागदपत्रांची यादी उपलब्ध आहे.

या प्रशिक्षणासाठी उमेदवारांची निवड सामायिक प्रवेश परीक्षा (CET) आणि त्यांच्या गुणांच्या आधारे केली जाईल. शैक्षणिक पात्रता आणि आरक्षण नियमांनुसार अंतिम निवड होईल.