Infosys : 17 महिन्यांच्या मुलाने 10 कोटींहून अधिक कमाई केली, जाणून घ्या कोण आहे एकाग्र रोहन मूर्ती!

Infosys : लाखो रुपयांची कमाई करायला अनेकांची अख्खी हायात जाते. तरी देखील ती व्यक्ती कमाई करू शकत नाही. परंतु, एका 17 महिन्यांच्या मुलाने ज्याला ना सद्या बोलता येते, ना अजून नीटसे चालता येते, असा चिमुकल्याने तब्बल 10 कोटींहून अधिक कमाई केली. होय हे अगदी खरं आहे. तुम्ही म्हणाल की, हे कसे शक्य झाले. हा 17 महिन्यांचा मुलगा कोण आहे, चला तर जाणून घेऊया त्याविषयी सर्व काही.

कोण आहे एकाग्र रोहन मूर्ती?

मिळालेल्या माहितीनुसार, इन्फोसिसचे सह-संस्थापक नारायण मूर्ती व त्यांच्या पत्नी सुधा मूर्ती यांचे 17 महिन्यांचे नातू एकाग्र रोहन मूर्ती यांना मार्च 2025 मध्ये संपणाऱ्या आर्थिक वर्षासाठी कंपनीच्या अंतिम लाभांशातून 3.3 कोटी रुपये मिळणार आहेत. एकाग्र नारायण मूर्ती हा कृष्णन मूर्ती व त्यांची पत्नी अपर्णा कृष्णन यांचा मुलगा आहे.

एकाग्रकडे इन्फोसिसचे 15 लाख शेअर्स

एकाग्रकडे इन्फोसिसचे 15 लाख शेअर्स आहेत, जे कंपनीतील 0.04 टक्के हिस्सेदारीच्या समतुल्य आहेत. एकाग्र चार महिन्यांचा असताना, नारायण मूर्ती यांनी त्याला हे शेअर्स भेट म्हणून दिले. त्यावेळी या शेअर्सचे बाजारमूल्य 240 कोटी रुपयांपेक्षा जास्त होते.

इन्फोसिसने अंतिम लाभांश केला जाहीर

गुरुवारी, इन्फोसिसने प्रति शेअर 22 रुपये अंतिम लाभांश जाहीर केला. आता एकाग्राकडे 15 लाख शेअर्स असल्याने, त्यांना लाभांश म्हणून 3.3 कोटी रुपये मिळतील. यासह, त्यांचे आतापर्यंतचे लाभांशापासूनचे एकूण उत्पन्न 10.65 कोटी रुपये होईल.

नोव्हेंबर 2023 मध्ये बेंगळुरू येथे जन्मलेला एकाग्र रोहन मूर्ती हा नारायण मूर्ती आणि सुधा मूर्ती यांचा तिसरा नातू आहे. त्यांना दोन नाती देखील आहेत. त्यांची नावे कृष्णा आणि अनुष्का. अक्षता मूर्ती आणि ब्रिटिश पंतप्रधान ऋषी सुनक यांंच्या त्या मुली आहेत.

या कुटुंबातील सदस्यांना मिळणार लाभांश

केवळ 17 महिन्यांचा असलेला एकाग्र भारतातील सर्वात तरुण करोडपतींपैकी एक मानला जातो. कंपनीचे शेअर्स भेट म्हणून मिळाल्यापासून, इन्फोसिसने प्रति शेअर 49 रुपयांच्या दराने तीन लाभांश जाहीर केले आहेत.

या आधारावर, वर्षाच्या सुरुवातीला त्यांना अंतरिम पेमेंट म्हणून 7.35 कोटी रुपये मिळाले. नारायण मूर्ती यांची मुलगी अक्षता मूर्ती यांच्याकडे कंपनीचे 3.89 लाख शेअर्स आहेत, म्हणजेच कंपनीतील 1.04 टक्के हिस्सा. त्यांना इन्फोसिसच्या अंतिम लाभांशातून 85.71 कोटी रुपये देखील मिळतील.

नारायण मूर्ती यांना किती लाभांश मिळणार?

नारायण मूर्ती यांना स्वतः 33.3 कोटी रुपये लाभांश म्हणून मिळतील, तर त्यांच्या पत्नी सुधा मूर्ती यांना 76 कोटी रुपये मिळतील. लाभांश मिळविण्याची रेकॉर्ड तारीख 30 मे निश्चित करण्यात आली आहे आणि पेमेंट 30 जून रोजी केले जाईल.