RBI Monetary Policy: व्याजदरात कोणताही बदल नाही, 6.5% वर कायम

Rbi monetary policy : रिझर्व्ह बँक ऑफ इंडिया (RBI) ने आज आपले आर्थिक धोरण जाहीर केले. पतधोरण जाहीर करताना रिझर्व्ह बँकेच्या गव्हर्नर शक्तीकांत दास यांनी व्याजदरात कोणताही बदल केलेला नाही. व्याजदर 6.5 टक्के कायम ठेवण्यात आला आहे. RBI च्या आर्थिक धोरण समितीच्या 6 सदस्यांच्या तीन दिवसीय बैठकीनंतर आज RBI गव्हर्नरांनी यांनी चलनविषयक धोरण समितीच्या निर्णयाची माहिती देताना सांगितले की, रेपो दरात कोणताही बदल नाही.

सलग दहाव्यांदा आरबीआयने व्याजदर स्थिर ठेवले आहेत. रेपो दर स्थिर ठेवण्याव्यतिरिक्त गव्हर्नर दास यांनी रिझर्व्ह बँक क्लायमेट रिस्क इन्फॉर्मेशन सिस्टीम, एक नवीन डेटा रिपॉझिटरी स्थापन करण्याची घोषणा केली. धोरणातील बदलासह हा उपक्रम, विकसित होत असलेल्या आर्थिक परिस्थितीशी जुळवून घेण्यासाठी आपल्या धोरणात्मक निर्णयांमध्ये अधिक लवचिकता आणण्याचा आरबीआयचा उद्देश असल्याचे दिसून येते.

गव्हर्नर दास यांनी प्रतिकूल हवामान आणि भू-राजकीय तणाव यांचा संभाव्य परिणाम लक्षात घेता चलनवाढीच्या अनेक जोखमीवर प्रकाश टाकला. दुसऱ्या तिमाहीत CPI महागाई दर 4.1% असेल असा अंदाज व्यक्त करून त्यांनी लक्ष्य श्रेणीमध्ये चलनवाढ ठेवण्याच्या महत्त्वावर जोर दिला.

सांख्यिकी आणि कार्यक्रम अंमलबजावणी मंत्रालयाच्या मते, अखिल भारतीय ग्राहक किंमत निर्देशांक (CPI) महागाई ऑगस्टमध्ये 3.65 टक्क्यांवर घसरली, जी आरबीआयच्या 2-6 टक्क्यांच्या लक्ष्य श्रेणीमध्ये आहे. अन्नधान्य चलनवाढ 5.65 टक्क्यांवर नोंदवून मध्यवर्ती बँकेच्या 4 टक्क्यांच्या मध्यम मुदतीच्या उद्दिष्टापेक्षा जास्त आहे. जागतिक कच्च्या तेलाच्या वाढत्या किमतींमुळे पश्चिम आशियातील तणाव वाढला असून महागाईची चिंता वाढली आहे.