सप्टेंबरमध्ये पेन्शन ते ITR भरण्यापर्यंत अंतीम मुदत! या तारखेच्या आत करा ही 3 कामं नाहीतर बसेल फटका

ITR UPS NPS Bank fd deadline september 2025 : आज १ सप्टेंबर आजपासून नव्या महिन्याला सुरुवात झाली आहे. हा महिना सर्वसामान्यांसाठी खूप महत्त्वाचा आहे, कारण यामध्ये अनेक मोठ्या कामांची अंतिम मुदत (डेडलाइन) निश्चित करण्यात आली आहे. जर तुम्ही ही कामे वेळेवर पूर्ण केली नाहीत, तर तुमची अडचण वाढू शकते. यामध्ये इन्कम टॅक्स रिटर्न (ITR) भरणे, पेन्शन योजना निवडणे आणि विशिष्ट एफडीमध्ये गुंतवणूक करणे समाविष्ट आहे. सप्टेंबरमध्ये कोणत्या कामांची अंतिम मुदत संपत आहे आणि ती पूर्ण करणे का आवश्यक आहे, हे जाणून घेऊया.

१. १५ सप्टेंबर: आयटीआर भरण्याची अंतिम तारीख

जर तुम्ही अद्याप तुमचा इन्कम टॅक्स रिटर्न (ITR) भरला नसेल, तर आता वेळ वेगाने निघून जात आहे. सरकारने ITR भरण्याची अंतिम तारीख १५ सप्टेंबर २०२५ निश्चित केली आहे. या तारखेनंतर रिटर्न भरणाऱ्यांना विलंब शुल्क आणि दंड भरावा लागू शकतो. एवढेच नाही, तर आयकर विभागाकडून नोटीस देखील पाठवली जाऊ शकते. त्यामुळे, शेवटच्या क्षणाची वाट न पाहता, लवकरात लवकर तुमचा ITR भरावा असा सल्ला दिला जातो.

२. ३० सप्टेंबर: यूपीएस आणि एनपीएस पैकी एकाची निवड करण्याची अंतिम मुदत

केंद्र सरकारच्या कर्मचाऱ्यांसाठी पेन्शन योजनेशी संबंधित एक मोठा निर्णय घेणे अनिवार्य आहे. कर्मचाऱ्यांना युनिफाइड पेन्शन स्कीम (UPS) आणि नॅशनल पेन्शन सिस्टम (NPS) यापैकी एकाची निवड करावी लागेल. सरकारने या निर्णयासाठी ३० सप्टेंबर २०२५ ही अंतिम मुदत निश्चित केली आहे. यापूर्वी ही तारीख ३० जून होती, पण कर्मचाऱ्यांना अधिक वेळ देण्यासाठी ती तीन महिन्यांनी वाढवण्यात आली. जर तुम्ही सरकारी कर्मचारी असाल आणि अद्याप निर्णय घेतला नसेल, तर सप्टेंबर महिना संपण्यापूर्वी पेन्शन योजनेची निवड नक्की करा, अन्यथा तुमच्या निवृत्तीच्या योजनांवर परिणाम होऊ शकतो.

३. ३० सप्टेंबर: आयडीबीआय आणि इंडियन बँकेच्या विशेष एफडीची अंतिम तारीख

गुंतवणूकदारांसाठीही सप्टेंबर महिना महत्त्वाचा आहे. आयडीबीआय बँक आणि इंडियन बँकेच्या विशेष मुदत ठेव (FD) योजनांमध्ये पैसे गुंतवण्याची अंतिम तारीख ३० सप्टेंबर २०२५ निश्चित करण्यात आली आहे. या विशेष एफडी योजनांवर सामान्य एफडीच्या तुलनेत जास्त व्याजदर मिळत आहे. जर तुम्ही सुरक्षित आणि निश्चित परतावा देणाऱ्या पर्यायाच्या शोधात असाल, तर ही संधी तुमच्यासाठी फायदेशीर ठरू शकते.

या अंतिम मुदतींकडे लक्ष देणे का महत्त्वाचे आहे?

इन्कम टॅक्स रिटर्न, पेन्शन योजना आणि एफडी गुंतवणूक, ही तिन्ही कामे तुमच्या आर्थिक भविष्याशी जोडलेली आहेत. वेळेवर आयटीआर भरल्याने केवळ कायदेशीर अडचणींपासून बचाव होत नाही, तर तुमचे रेकॉर्डही स्वच्छ राहते. पेन्शन योजनेची निवड तुमच्या निवृत्तीला सुरक्षित करेल, तर एफडीमध्ये वेळेवर गुंतवणूक केल्याने तुम्हाला चांगल्या व्याजाचा फायदा मिळू शकेल.