बाप रे! 2025मध्ये सोन्याचे दर गगनाला भिडले, वर्षभरातील आकडा पाहून व्हाल थक्क, चांदीचा रेट उच्चांकी!

Gold and Silver Rate News : गुंतवणूकदारांसाठी सोन्याची झळाळी आणि चांदीची चमक यंदा ऐतिहासिक ठरत आहे. आज २९ डिसेंबर रोजी, सलग पाचव्या दिवशी सराफा बाजारात सोने आणि चांदीने विक्रमी उच्चांक गाठला आहे. सोन्याच्या दराने 1.38 लाखांची पातळी ओलांडली असून चांदीने तर थेट अडीच लाखांच्या दिशेने धाव घेतली आहे.

आजचे ताजे दर (IBJA नुसार)

इंडिया बुलियन अँड ज्वेलर्स असोसिएशनच्या (IBJA) ताज्या आकडेवारीनुसार, मौल्यवान धातूंच्या किमतीत मोठी वाढ झाली आहे:

• धातू : आजचा दर (२९ डिसेंबर २०२५): झालेली वाढ : पूर्वीचा दर
• सोने (१० ग्रॅम) : ₹१,३८,१६१ : ₹२०५ : ₹१,३७,९५६
• चांदी (१ किलो): ₹२,४३,४८३ : ₹१५,३७६ : ₹२,२८,१०७

२०२५ मधील अभूतपूर्व दरवाढ

वर्ष २०२५ हे सोने-चांदीच्या गुंतवणुकीसाठी 'सुवर्णकाळ' ठरले आहे. ३१ डिसेंबर २०२४ पासून आतापर्यंत झालेली वाढ थक्क करणारी आहे:

सोन्याची झेप : १० ग्रॅम सोन्याचा भाव ७६,१६२ रुपयांवरून १,३८,१६१ रुपयांवर पोहोचला (+₹६१,९९९ वाढ).

चांदीचा वेग : एक किलो चांदी ८६,०१७ रुपयांवरून थेट २,४३,४८३ रुपयांवर पोहोचली (+₹१,५७,४६६ वाढ)

सोने महागण्याची ३ मुख्य कारणे

१. कमकुवत डॉलर

अमेरिकेने व्याजदरात कपात केल्यामुळे डॉलरचा प्रभाव कमी झाला आहे. पर्यायाने सोन्याची होल्डिंग कॉस्ट कमी झाल्यामुळे जागतिक स्तरावर सोने खरेदी वाढली आहे.

२. भू-राजकीय तणाव

रशिया-युक्रेन युद्ध आणि जागतिक अस्थिरतेमुळे गुंतवणूकदार शेअर बाजारापेक्षा सोन्याला सर्वात सुरक्षित गुंतवणूक (Safe Haven) मानत आहेत. ३. मध्यवर्ती बँकांची खरेदी: चीनसह अनेक देशांच्या रिझर्व्ह बँकांनी सोन्याचा साठा वाढवण्यासाठी मोठी खरेदी (सुमारे ९०० टन) सुरू केली आहे.

चांदीतील तेजीची ३ प्रमुख कारणे

१. औद्योगिक मागणी : आता चांदी केवळ दागिन्यापुरती मर्यादित नसून सौर ऊर्जा, इलेक्ट्रॉनिक्स आणि इलेक्ट्रिक वाहनांमध्ये (EV) कच्चा माल म्हणून मोठ्या प्रमाणावर वापरली जात आहे.

२. टॅरिफची भीती: अमेरिकेचे संभाव्य धोरण आणि 'टॅरिफ'च्या भीतीपोटी अमेरिकन कंपन्या चांदीचा मोठा साठा जमा करत आहेत. ३. पुरवठ्याची कमतरता: वाढती मागणी आणि खाणकामातून होणारा मर्यादित पुरवठा यामुळे बाजारात तेजी कायम आहे.

भविष्यातील अंदाज: तेजी कायम राहणार?

ही दरवाढ इथेच थांबणार नाही. चांदीची वाढती मागणी पाहता, येत्या एक वर्षात ती २.७५ लाख रुपये प्रति किलो पर्यंत जाऊ शकते. तर सोने देखील पुढील वर्षापर्यंत १.५० लाख रुपये प्रति १० ग्रॅम चा टप्पा पार करण्याची शक्यता आहे.