पाडव्याच्या मुहूर्तावर सोने-चांदी दरात घसरण; विक्रमी उच्चांकावरून सोने 5 तर चांदी 25 हजारांनी खाली!

Today gold and silver prices : दिवाळीचा सण सुरू असून आज दिवाळी पाडव्याच्या सण साजरा केला जात आहे. दरम्यान, गेल्या पाच दिवसांपासून सोन्या-चांदीच्या किमतींना मोठा झटका बसला आहे.

गेल्या काही दिवसांपासून सातत्याने वाढणाऱ्या मौल्यवान धातूंच्या किमतीत मोठी घसरण नोंदवली गेली आहे. सोन्याचा दर त्याच्या सर्वकालीन उच्चांकावरून तब्बल ₹ ५,६७७ ने घसरला आहे, तर चांदीने तिच्या विक्रमी उच्चांकावरून ₹२५,५९९ ची मोठी घसरण झालेली आहे.

सोन्याच्या दरातील मोठी घसरण

इंडिया बुलियन अँड ज्वेलर्स असोसिएशन (IBJA) च्या आकडेवारीनुसार, २४ कॅरेट सोन्याच्या १० ग्रॅमची किंमत २२ ऑक्टोबर रोजी एकाच दिवसात ₹३,७२६ ने घसरून ₹१,२३,९०७ वर आली आहे. तर २० ऑक्टोबर रोजी सोन्याचा दर ₹१,२७,६३३ होता. १७ ऑक्टोबर रोजी सोन्याने ₹१,२९,५८४ च्या सर्वकालीन उच्चांकाला स्पर्श केला होता.

चांदीच्या किमतीतही मोठी घसरण!

चांदीच्या दरातही मोठी घसरण झाली आहे. २२ ऑक्टोबर रोजी चांदीच्या किमती एकाच दिवसात ₹१०,५४९ ने घसरून ₹१,५२,५०१ प्रति किलोवर आल्या. यापूर्वी चांदीचा दर ₹१,६३,०५० प्रति किलो होता. १४ ऑक्टोबर रोजी चांदीने ₹१,७८,१०० च्या विक्रमी उच्चांकावर मजल मारली होती.

सोने-चांदीच्या किमती घसरण का झाली?

सोन्या-चांदीच्या दरात अचानक झालेल्या या घसरणीमागे जागतिक आणि देशांतर्गत दोन्ही कारणे आहेत. दिवाळीसारखे मोठे सण आणि मुहूर्तावरील खरेदीचा हंगाम संपल्यामुळे भारतात सोने-चांदीची मागणी तात्पुरती मंदावली आहे. मागणीतील या घटमुळे किमतींवर दबाव आला.

अमेरिका-चीन व्यापार तणाव कमी होणे

सोने आणि चांदीला जागतिक स्तरावर "सुरक्षित आश्रयस्थान" मानले जाते. जेव्हा भू-राजकीय किंवा आर्थिक तणाव वाढतो, तेव्हा गुंतवणूकदार सुरक्षित गुंतवणूक म्हणून मौल्यवान धातू खरेदी करतात. मात्र, अमेरिकेचे अध्यक्ष डोनाल्ड ट्रम्प आणि चीनचे राष्ट्राध्यक्ष शी जिनपिंग यांच्यात पुढील आठवड्यात बैठक होणार असल्याच्या बातमीमुळे व्यापार युद्धाची चिंता कमी झाली आहे, ज्यामुळे सोन्या-चांदीची मागणी घटली आहे.

नफा घेणे आणि तांत्रिक विक्री

किमती प्रचंड वाढल्यामुळे अनेक गुंतवणूकदार सध्या नफा बुक करत आहेत. तसेच, 'रिलेटिव्ह स्ट्रेंथ इंडेक्स' सारख्या तांत्रिक निर्देशांकांनी किमती 'जास्त खरेदी' क्षेत्रात पोहोचल्याचे संकेत दिले. त्यामुळे ट्रेंड फॉलोअर्स आणि डीलर्सनी मोठ्या प्रमाणात विक्री सुरू केली.

या वर्षी सोने आणि चांदीची चमकदार वाढ!

घसरण होऊनही, या वर्षातील सोने आणि चांदीची एकूण कामगिरी अत्यंत मजबूत राहिली आहे. या वर्षात सोन्याच्या किमतीत आतापर्यंत ₹४७,७४५ ने वाढ झाली आहे. (३१ डिसेंबर २०२४ रोजी किंमत: ₹७६,१६२ वरून आता ₹१,२३,९०७). तर, चांदीच्या किमतीतही या काळात ₹६६,४८४ ने मोठी वाढ झाली आहे. (३१ डिसेंबर २०२४ रोजी किंमत: ₹८६,०१७ वरून आता ₹१,५२,५०१ प्रति किलो).

सोने खरेदी करताना काय काळजी घ्यावी?

१. प्रमाणित सोने खरेदी करा

नेहमी भारतीय मानक ब्युरो (BIS) च्या हॉलमार्क (Hallmark) सह प्रमाणित सोने खरेदी करा. हॉलमार्किंग सोन्याच्या कॅरेटची शुद्धता दर्शवते.

२. किंमत तपासा

खरेदीच्या दिवशी सोन्याचे अचूक वजन आणि किंमत इंडिया बुलियन अँड ज्वेलर्स असोसिएशन (IBJA) च्या वेबसाइटसारख्या अधिकृत स्त्रोतांकडून तपासा. सोन्याच्या किमती २४ कॅरेट, २२ कॅरेट आणि १८ कॅरेटनुसार बदलतात.